Bydd Caerdydd yn treialu ei gynllun Trafnidiaeth Seiliedig ar Alw cyntaf erioed lle bydd teithwyr yn gallu archebu teithiau bws, o bell, a lle bydd amserlenni’n cael eu haddasu’n ôl y galw.

fflecsi G1 yw’r gwasanaeth newydd sbon a fydd yn cael ei weithredu gan NAT Group mewn partneriaeth â Chyngor Caerdydd a Trafnidiaeth Cymru.

Bydd y gwasanaeth newydd yn disodli llwybr G1 presennol NAT Group, sy’n gweithredu rhwng Gabalfa a Gwaelod-y-garth drwy’r Eglwys Newydd, a bydd teithwyr yn gallu gofyn am gael eu casglu o arosfannau ar hyd y llwybr ar adeg o’u dewis nhw, drwy ddefnyddio’r ap i archebu ymlaen llaw neu drwy ffonio’r rhif cyswllt ar gyfer cwsmeriaid.

Bydd y cynllun peilot tri mis yn dechrau ddydd Llun 29 Mehefin ac yn disodli’r gwasanaeth bws blaenorol a oedd ag amserlen benodol.

Bydd llwybr G1 yn cael ei wasanaethu gan gerbyd â brand arbennig gan ddefnyddio’r logos ar gyfer fflecsi ac Adventure Travel, sef enw newydd NAT Group.

I gael rhagor o wybodaeth, ewch i www.natgroup.co.uk.