Mae Barclay Davies, Cyfarwyddwr Bus Users yng Nghymru, wedi cael OBE yn rhestr Anrhydeddau’r Flwyddyn Newydd y Frenhines ar gyfer 2022.

Fel Cyfarwyddwr Bus Users yng Nghymru, mae Barclay wedi hwyluso dros 200 o ddigwyddiadau sydd wedi dod â theithwyr a darparwyr trafnidiaeth leol ynghyd. Mae wedi bod yn cynrychioli teithwyr a chymunedau lleol gerbron y sawl sy’n gyfrifol am gynllunio a darparu gwasanaethau, ac mae wedi bod yn hyrwyddo bysiau fel dull o hybu newid er mwyn gwella ansawdd aer a lleihau tagfeydd traffig.

Yn ystod y pandemig, buodd Barclay a’i dîm yn ymgyrchu dros gael cymorth i weithredwyr er mwyn i deithwyr allu parhau i wneud teithiau hanfodol, a buodd yn hyrwyddo neges #ByddwchYnGaredigArYBws #BeBusKind Bus Users ymhlith gweithredwyr a theithwyr gan ofyn i bobl barchu ei gilydd wrth deithio, yn enwedig y sawl nad ydynt yn gallu gwisgo gorchudd wyneb.

Meddai Barclay Davies, ar ôl cael ei anrhydeddu am ei wasanaethau i drafnidiaeth gyhoeddus a’r llywodraeth:

“Mae cael yr anrhydedd hon yn fraint enfawr. Rwy’n ffodus o fod yn gweithio gyda llawer o gydweithwyr dawnus, ac mae’r anrhydedd hon yn gydnabyddiaeth iddyn nhw ac i waith Bus Users hefyd. Mae’n gyfnod cyffrous i drafnidiaeth gyhoeddus yng Nghymru, yn dilyn lansio Llwybr Newydd: Strategaeth Drafnidiaeth Cymru yn ddiweddar ynghyd â chamau i wella ansawdd aer, datgarboneiddio cerbydau trafnidiaeth a gwella opsiynau o ran trafnidiaeth gyhoeddus i bawb. Rwy’n edrych ymlaen at barhau i fod yn eiriolwr dros deithwyr bysiau ac at geisio dod â phobl a chymunedau ynghyd drwy drafnidiaeth hygyrch a chynhwysol.”

Meddai Prif Weithredwr Bus Users, Claire Walters, wrth groesawu’r anrhydedd:

“Rydym wrth ein bodd bod gwaith Barclay yn cael ei gydnabod fel hyn. Mae ein hymgyrchoedd, ein gwasanaethau Dulliau Amgen o Ddatrys Anghydfod, a’n gwaith i fonitro’r graddau y mae gweithredwyr bysiau’n cydymffurfio â’u rhwymedigaethau wedi arwain at newid go iawn ac at wasanaethau gwell i deithwyr ledled Cymru. Bydd Barclay a’i dîm yn parhau i geisio gwella mynediad i drafnidiaeth gynhwysol a chynaliadwy a sicrhau’r holl fanteision cymdeithasol, amgylcheddol ac economaidd sy’n dod yn sgil hynny.”

Mae Bus Users yn gorff cymeradwy Dulliau Amgen o Ddatrys Anghydfod ar gyfer teithwyr bysiau, a dyma’r corff sy’n ymdrin â chwynion dan ddeddfwriaeth ynglŷn â hawliau teithwyr ar fysiau. Rydym hefyd yn perthyn i Gynghrair Trafnidiaeth Gynaliadwy, sef grŵp sy’n ceisio hyrwyddo manteision trafnidiaeth gyhoeddus a manteision teithio ar y cyd a theithio llesol.

Ffynhonnell y wybodaeth: Bus Users