Blog
Cardiff Office Opening

Agoriad y swyddfa yng Nghaerdydd a bore coffi Macmillan

16 Ionawr 2014

Mae’n ddechrau blwyddyn newydd, a hoffai pawb yma yn Traveline Cymru ddymuno Blwyddyn Newydd Dda i bob un ohonoch! Rydym i gyd wedi dychwelyd i’r gwaith ac yn barod i wynebu 2014.

I’r tîm yng Nghaerdydd, roedd hynny’n golygu dychwelyd i’n swyddfeydd newydd ar ôl symud o’n hen safle ym mis Mehefin y llynedd. Mae symud i swyddfa newydd wedi bod yn fanteisiol iawn i ni, oherwydd mae mwy o le ar gael yn awr ar gyfer ein tîm sy’n parhau i dyfu, ac rydym mewn man sy’n llawer mwy hygyrch. Ar ôl ymgartrefu yn ystod y misoedd cyntaf, cafodd y swyddfa newydd yng Nghaerdydd ei hagor yn swyddogol ddydd Mercher 4 Rhagfyr 2013. Yn rhan o’r diwrnod cynhaliwyd bore coffi hefyd i godi arian i elusen Cymorth Canser Macmillan, sy’n achos arbennig iawn.

Ein gwesteion yn mwynhau’r bore coffi

Roedd y diwrnod yn llwyddiant ysgubol, a chafwyd presenoldeb a chefnogaeth wych gan nifer o gwmnïau a phobl yr ydym yn cael y pleser o weithio ochr yn ochr â hwy. Ar ddechrau’r agoriad swyddogol croesawodd ein Rheolwr Cyffredinol, Graham Walter, y gwesteion ac esboniodd sut y penderfynwyd symud i swyddfa newydd. Yna croesawodd Cynthia Ogbonna, Rheolwr Gyfarwyddwr Bws Caerdydd, a fu’n sôn ychydig am yr adeilad, cyn mynd ati i ddadorchuddio plac newydd sbon Traveline Cymru.

Graham a Cynthia yn dadorchuddio plac newydd Traveline Cymru

Ar ôl i’r swyddfa gael ei hagor yn swyddogol, dechreuodd y bore coffi o ddifrif. Roedd pob un o’n staff wedi cyfrannu drwy bobi cacennau a melysion cartref, a chafwyd cyfraniad hael gan bopty Greggs. Roedd Laura, ein Swyddog Marchnata, wedi gwneud gwaith ardderchog yn trefnu’r diwrnod - roedd digon o gacennau a choffi ar gael i bawb, ac roedd y digwyddiad wedi llwyddo i dynnu sylw at achos codi arian Macmillan gan fod balŵns o amgylch waliau ein swyddfa newydd. Dyma’r hyn a oedd ganddi i’w ddweud am y digwyddiad:

“Roedd cynnal bore coffi Macmillan yr un pryd ag agoriad swyddogol ein swyddfa yn gyfle gwych i godi arian at elusen arbennig. Roedd yr holl staff wedi gwneud gwaith arbennig gyda’u cacennau cartref, ac roedd pawb a fynychodd y digwyddiad wedi cyfrannu’n hael. Roedd yn ddigwyddiad gwirioneddol hyfryd ac roedd yn braf cael y fath gefnogaeth gan ein partneriaid a’n cyflenwyr.”

Y cacennau cartref blasus a gafodd eu pobi gan ein staff

Tynnwyd rhai lluniau o’r digwyddiad wrth i’r diwrnod fynd yn ei flaen, a gellir eu gweld ar ein tudalen Facebook. Hoffem ddiolch i bawb a fynychodd am eu cefnogaeth a’u cyfraniadau hael. Gyda’n gilydd llwyddwyd i godi £181.70 ar gyfer Cymorth Canser Macmillan. Mae ein tîm yng Nghaerdydd bellach yn edrych ymlaen at dreulio blwyddyn lwyddiannus arall yn ein cartref newydd.

Visit Traveline Cymru's profile on Pinterest.


Pob blog Rhannwch y neges hon